國際拍賣行佳士得隨便拍賣一幅畫、一件古董，可能都要幾百萬，甚至上千萬元，佢哋近日在港舉行秋拍，新設一個專場拍賣120個包括Chanel、愛馬仕（Hermès）等名貴手袋，總估值只係700萬元，表面上似乎犯不着勞師動眾搞一個專場，但此舉其實係想方便大家「入門」，鋪路釣大魚。
正如佳士得亞洲區總裁魏蔚所講，「買得起幾十萬一個包包的人，應該買得起其他藝術品」。佢坦言，拍賣手袋利潤唔多，最緊要係做得開心，讓未參與過嘅人知道拍賣並不嚴肅，藉此吸納新客戶。
香港一直有名貴手袋二手市場，有其他渠道交易，佢認為，透過佳士得買賣應該都係看重呢個品牌。
今日下午舉行呢場手袋拍賣，120個手袋嘅估價由4,000元至45萬元不等。魏蔚打趣話，身邊唔少女友人從來不過問佢嘅工作，一知道佳士得要拍賣手袋，就嚷住要登記成為客戶，準備參與競投。
佢本身都係愛袋之人，家中至少有50個名貴手袋，要用一個大衣櫃、逐個包好存放。訪問期間，佢翻閱手袋圖錄，看得心癢癢，可惜佢不能參與今次拍賣。

男人可能一買買幾個

相對古董、名畫等動輒幾百萬、過千萬元嘅傳統拍品，魏蔚形容，手袋具有較強嘅「親和力」，買家都係消費者，幾十萬買個袋用，並非收藏家。
魏蔚有多年拍賣行經驗，十分明白買家心態，佢指，「男人在拍賣場買一幅畫可能幾百萬，甚至上千萬元，見到一個包包只是幾萬、幾十萬元，應該很願意買，甚至一買就買幾個」。
佢估計今次拍賣可能會唔夠賣，事關「有些男人可能一下子買幾個包包，用來送給太太、紅顏知己、秘書等等，聖誕節都快到了吧」。魏蔚希望明年再辦專場時有200至300個手袋，甚至有藝術品類型。說到底，佢都係希望透過手袋拍賣吸納新客。

手袋狀況分六等級

佳士得收集二手名貴手袋有嚴格要求，除質素，最重要有收據，以證明手袋來源與真偽，手袋由誰擁有並非重點。
佳士得會給予每個手袋一個狀況報告評級，分一至六級，一級等於好似新的一樣，看來從未使用過；六級就有顯著磨損或損壞，使用前可能需要先維修或翻新。

李華華
mailto:[email protected]