由張崇德、張崇基及商天娥主演嘅音樂劇《馬丁路德》，將於9月喺葵涌劇院上演，張崇德同商天娥喺劇入面飾演由一對情侶變為夫妻，佢哋話劇中所有對白都要演唱出來，娥姐話6月已經開始練歌：「我之前做舞台劇有腰患，今次唔會有太多動作。今次所有要講嘅嘢都係唱出嚟，行一步都要唱歌，類似粵語長片。」

動作部份由崇基負責，張崇基話：「導演問我識咩功夫，問我舞刀舞棍得唔得，我話盡量。」張崇德話今次舞台佈景將有極大震撼設計，所有演員近50人會有大型歌舞演出。