一名26歲姓鍾父親前年為制止半個月大女兒哭泣，曾多次猛力左右搖晃女兒，並大力掌摑及搣瘀女兒臉頰，最後導致女兒右眼已失明，左眼視網膜完全脫落，變成植物人。被告鍾紀緣的母親今日到法庭聽審，得悉兒子被判囚6年4個半月感到不滿意，又對兒子虐待女嬰一事感到難以置信，但直言：「佢都認咗罪都冇辦法啦」。

鍾母向《蘋果》透露，兒子數年前曾有一個拍拖數年的女友，兩人關係非常親密，而且一度同居並與鍾母同住，惟後來兒子外出與朋友「飲嘢」消遣時結識一名姓鄭女子，未幾女方更懷有身孕，兒子便決定負上責任，與當時的女友分手，並與姓鄭女子組織家庭誕下女嬰。

她指兒子其後與該名姓鄭女友及女友的母親一同搬到洪水橋一單位內居住，準備迎接新生命，惟他們飼養的狗隻在家中隨處便溺，女友的母親在家吸煙，搞到全屋烏煙瘴氣，令他深感困擾。雖然兒子曾經叫女友的母親搬離上址，但女友誕下女嬰後，又要求其母親搬回來陪月，兒子只好妥協，但環境一直持續惡劣，令他難以忍受。

鍾母又形容兒子性格沉默寡言，平日都不會大吵大鬧，亦甚少發脾氣，即使薪金微薄，但甚為錫女友，「個BB未出世之前，我個仔已經買咗好多BB嘢，仲要個女朋友臨生前一個月，佢(兒子)已經冇返工專心照顧個女朋友，搞到冇收入冇錢交租，要我幫手交住」。她形容兒子非常愛錫女嬰，經常逗她玩，「佢真係好錫個B女，又成日話買咗啲咩衫畀佢」，但承認曾見過女嬰臉頰有瘀痕，「嗰陣有問過阿仔點解，佢都係話搣吓塊臉，當時我都有叫過唔好咁大力」，豈料至出事當日，兒子抱著女嬰到鍾母工作的地方尋求幫助，「佢好徬徨...仲話我個BB唔識喊，叫我幫佢睇吓，嗰陣個BB仲識郁」。她當時立即與兒子抱著女嬰趕往醫院搶救，沒想過後果嚴重。

事件至今，鍾母稱兒子事發後一直未能探望女兒，得悉女兒變成植物人後，僅不斷哭訴表示「好後悔」。被告鍾紀緣（26歲）昨承認3項故意襲擊而導致兒童受到損害及1項刑事恐嚇罪。案發時被告年僅24歲，其鄭姓女友則23歲，女嬰於2016年11月29日出生，兩日後出院與父母及外婆同住於洪水橋。

你敢爆，我敢獎！ 立即WhatsApp《蘋果》24小時爆相爆片熱線 或致電：63836568