曾出演韓劇《懷抱太陽的月亮》嘅37歲男星宋在熙，噚日與31歲演員池素妍拉埋天窗，雖然兩人婚前就不時透過Instagram高調放閃，不過考慮到雙方家人嘅立場，婚禮最終於京畿道南楊州PRAUM MUSEUM以非公開形式舉行，只邀請親友出席。

宋在熙及池素妍今早透過婚禮公司公開噚日婚禮現場嘅相，只見兩人拖住手低頭以及喺親友面前宣讀愛的宣言，認真甜蜜，而兩人今日拖手Sweet爆現身機場，出發前往越南度蜜月。

另外，宋在熙及池素妍日前透過綜藝節目公開愛巢，只見25坪公寓中足足有3間房、兩個洗手間，就連主持人都驚訝兩個人住似乎太大，唔知兩人係咪打算生好多小朋友呢？