美國著名經濟學家韋恩（ByronWein）較早前喺《十大驚奇》中預測，美股今年可大漲，美國大企業盈利亦會好過市場預期；不過，部份專家冇咁樂觀，甚至認為美國經濟會陷入衰退。喺《MSNBC討論區》，就有唔少網民大呻對經濟情況不滿。
網民rob-edits話：「踏入2007年，美國經濟似乎冇乜起色，而且繼續走下坡，都係拜聯儲局過去幾年猛咁加息所賜。」
kl就認為，「美國經濟表面上唔算差，但依然有數以百萬計好窮嘅打工仔，連基本日常生活開支都無法應付。」
DucaContadino講：「美國經濟𠵱家好似『地殼板塊移動』咁，慢慢轉壞，並產生陣陣『漣漪』，將來恐怕會急轉直下，演變為『海嘯』，因為美國人實質工資正下跌，但負債增加；加上愈來愈多職位外判到海外，社會福利又不足，足以引發大災難。」

病徵陸續出現

佢仲話美國經濟已有病徵出現，例如多家航空公司相繼破產、唔少公司縮減員工退休計劃同醫療福利、聯邦政府打算削減社會保障……仲有，美國政府正修例，令弱勢社群承擔更多稅款，政府簡直係唔知民間疾苦。
受樓市降溫影響，美國06年第三季經濟增長向下修訂至2%。分析師認為，樓市放緩會進一步打擊當地經濟，預料今年增長只有2.3%，較06年低1個百分點，且是02年至今最慢。
標準普爾經濟學家貝赫拉維什則估計，美國經濟陷入衰退的機會有25%。