周杰倫日前到日本領取MTV台頒發嘅獎項,重係由日本偶像組合DAPUMP頒獎畀佢。
周杰倫話知道日本歌迷唔多識佢,但佢今次去攞獎,可以同台見到濱崎步同安室奈美惠就覺得好興奮。
有消息話,本來周杰倫緋聞女友蔡依林今次都陪佢去日本,點知重讀緊大學嘅蔡依林原來要考試,為怕考試唔及格,惟有打電話同周杰倫講話唔陪得佢去囉。
趙薇周六上海「復出」
第九屆上海國際電影節及電視節喺今個禮拜六(八號)喺上海揭幕,到十三號閉幕。趙薇自從喺長沙俾觀眾上台淋屎之後,將首次再喺內地公開演出,出席呢個電影節嘅「星河飛歌」大型開幕演唱會。同台演出嘅重有郭富城、酒井法子、周迅、姜文、許茹芸、高倉健、蕭薔同埋美國百老匯演員吉米德斯。
林曉峰、康子妮拖手仔
林曉峰同拍拖十年嘅女朋友潘菁華分手,有傳係因為康子妮介入。雖然早排林曉峰同康子妮被人發現前後腳去紅館睇黎瑞恩演唱會,但佢哋依然都話唔係拍拖。不過,上周四下晝五點幾,馮仁昭喺金鐘太古廣場嘅停車場,親眼見到佢哋兩個手拖手,唔通咁嘅行為都唔算係拍拖?