繼前排嘅賣身葬父行乞二人組後，依家又有黛玉吐血，總之你諗得出嘅古裝悲情橋段，呢班叔伯兄弟都可以做畀你睇，只怕你睇完唔畀錢！

話說呢場大龍鳳，5月31日(周四)喺深水埗港鐵站A2出口上演，讀者麥生收工之後，諗住行吓鴨記，點知就見有位白衫阿姐，喺港鐵站出口外面，趴咗喺堆紙皮上面，不停嗑頭，麥生行埋去八吓，見到阿姐竟然嘔血，係堅嘔架，「見到成口血噴出黎！」由於演出太精彩，麥生睇咗分幾鐘先醒起要拍片。

就咁睇，阿姐七情上面，好痛苦咁架，佢面前塊紙皮，就有一攤紅色嘅液體，成嘴都紅晒，真係我見猶憐，咁精彩嘅表演，都吸引咗一啲市民嘅注意，但係大部分都係一臉疑惑，亦都冇人走去問佢有冇事，或者幫手call白車，可能係懷疑阿姐係咪進行緊行為藝術掛！但亦都有市民畀阿姐嘅內心戲感動，畀咗錢佢，有位女士仲畀咗100蚊！

正所謂，一個出色嘅演員，「演技應該係由外到內，再由內去返外」，阿姐嘅神級演繹，搞到連阿sir都擔心佢有事，走埋去問佢有冇事，駛唔駛去醫院咁，但阿姐吐血吐到忘我狀態，完全當班阿sir冇到，望都冇望，繼續出力吐，但呢個時候，血好似吐晒，變到好似痰上頸咁，但阿姐嘅表情依然keep到！阿sir走咗之後，港鐵職員終於出現，叫阿姐行過啲唔好阻住出口，但阿姐當然睬佢都傻啦！

雖然阿姐冇擺出募捐嘅字句，但麥先生認為，呢位阿姐一定係行乞黨成員，「吐血就去醫院啦！點會行乞！」

你敢爆，我敢獎！ 即Call《蘋果》24小時爆相爆片熱線 ：63836568