蔡約翰的馬近期在二班賽成績甚佳，今午（23日）沙田日馬，又有兩場二班賽事，其中第七場二班2000米更加三路興兵，派出「達羅素」、「翠龍」及「哈蝦巴爸」上陣。

翻查數據，今個月共舉行六場二班賽事，每場均有蔡廐馬勝出或入Q，共獲四冠兩亞佳績，包括剛戰憑「激賞」贏馬。

今期第七場二班2000米，蔡廐三路興兵，其中「達羅素」屬馬房首選出賽意願馬，此駒季內雖然四戰全負，不過上仗配祈普敦跑一班1600米已後追跑第五，尾兩段造23秒67及23秒9，連續兩段締速俱屬該場最快，狀態已見復蘇。

復課「達羅素」再安排連試兩課大閘得1亞1季，做足工夫再來，降入二班增程角逐更合腳法之2000米，雖然主帥莫雷拉續騎贏開之「翠龍」而冇揀「達羅素」，但「達羅素」繼續由祈普敦執韁。

祈普敦現時支持唔多，反而不用懷疑戰意，最近蔡廐在香港短途錦標出四駒，結果以祈普敦之「翩翩」演出最好跑第二，「達羅素」話唔定可以係「翩翩」之翻版。