周杰倫（周董）香港時間大前日喺英國迎娶拍拖四年嘅昆凌，兩人喺教堂舉行婚禮嘅短片噚日喺網上曝光，背景嘅音樂就係由周董親自操刀作曲，代替結婚進行曲嘅浪漫旋律，由當地弦樂團演奏。單手插袋嘅周董型爆進場，新娘昆凌蹺住澳洲籍父親步上紅地毯，周董緊張咁等外父將昆凌交到手上。

粉絲英國追星

周董挽住新娘步入教堂，揭起昆凌嘅頭紗後細心整理，兩人交換結婚戒指，含情互望深深一吻，甜蜜滿瀉，網友留言：「好感動，這曲太催淚了」、「比偶像劇還偶像劇了」而童心未泯嘅周董，見到新娘拋完花球後，竟然話：「好好玩，我也要。」結果周董拋花球畀兄弟接，十分搞笑。而昆凌嘅夢幻婚紗原來係黎巴嫩設計師喺加拿大創立嘅禮服品牌MIKAEL D，估計價值約五十萬港元。
周董結婚吸引大批粉絲到英國追星，佢唔忍心粉絲捱凍等候，叫工作人員送上熱朱古力畀佢哋暖胃，婚後第一日仲專登現身同粉絲合照，令粉絲十分興奮。
撰文：馮仁昭