田泰安今季成績出眾，季內已贏44場，在騎師榜排第三位，早前他表示希望今季能夠贏超過50場，故季尾仍非常努力搵實力馬騎。

今期（10日）日賽田泰安騎足11場。其中，第五場「好甜橙」上仗跑同程幾乎贏，三歲馬質新進步，今仗穩開勝門。

第五場四班1200米：形勢較為單純，徐雨石馬房的「好甜橙」上仗初跑同程，起步反應敏捷，前段落腳仲快過今次再度同場的「萬事欣」，沿途兩駒馬頭貼馬頭地搶放，不斷燃燒馬匹的鬥心。

此駒在直路依然奮勇向前，流露不甘後人的個性，競賽情緒高昂，鞍上人田泰安在最後一百米才正手打鞭，終點前再加速迫近頭馬「快利」，而力抗其後贏馬的「神威敖翔」，馬匹轉入徐廐後表現脫胎換骨，在四班肯定夠贏。

今仗再跑同程，對手仲弱過上仗，田泰安繼續騎值得信賴，贏馬開齋機會高。

「旅英公爵」前仗跑同程後上得第四，沈拿騎法啱發揮，今場面對一棚質新馬，可憑較豐富的作戰經驗恰對手，如近期贏四班賽的「包勝」及「神威敖翔」。

「大富大貴」季中曾休戰近半年，體力有優勢，季尾復出已跑過三仗，狀態漸入佳境，今場改配梁家俊，留前鬥後可爭入圍。

「小鳥敖翔」近期戴眼罩試泥閘一放到底勝出，今仗認真備戰，但獨沽一味靠放食糊的馬，可爭不穩。