失婚嘅荷李活型男畢彼特（Brad Pitt）新年冇得同子女共聚天倫，據悉佢為此感到好傷心。不過畢佬最近心情似乎已經平復，除咗出席金球獎頒獎禮外，噚日亦去馬利布出席一個慈善活動，為患咗表皮溶解水皰症嘅小朋友籌款，現場仲有史汀（Sting）及Chris Cornell表演。

畢佬喺台上負責介紹兩位表演嘉賓，仲不時搞gag寸史汀令全場笑聲不絕。畢佬當日滿場飛，同朋友暢談，亦特別搵咗患病小朋友聊天及合照，愛心爆棚。