前星期有讀者來問一個字：斁。呢個字國音讀作yi，廣東話讀作「都」，意思係「厭倦」。不過左丁山唔係文字專家，請大家以後自己查字典或者上網搜尋。
最近講起富士康事件，左丁山懷疑如果富士康得唔到「蘋果」嘅支持，點可能大幅度加薪。有數得計，假如原本工資係一千元人民幣，即時加薪三成，就變咗一千三百元，到咗十月，再加薪六成六，就增加至二千一百五十八元。加薪幅度係115.8%。即使唔係咁計，而係前後加薪九百六十六元，加薪仍然增至一千九百六十六元，加99.6%，全世界邊度有公司可以咁樣加薪o架，加俾個別優秀員工就話啫，全體員工在半年內加薪100%以上？任何一位生意人都認為不可能，除非係獲利極高嘅公司。但富士康唔係啫，做一百元生意，毛利只有五元九角（二○○九年度數字），一說富士康薪酬佔營業額8%，如果薪酬增加一倍，就變成營業額嘅16%，毛利全部冇晒，直情虧損㖭！
咁唔合邏輯之事，左丁山唔明白。一位讀者A用英文來郵，指出好多人都唔知道，台灣啲代工（contractmanufacturing）公司有幾本帳簿嘅，一本俾客戶睇，一本俾監管當局及投資者睇，一本俾中國大陸地方政府睇，仲有一本只係自己閂埋房門睇。咁講法，代工咪有四本帳簿？邊本先至係真？讀者A話香港人唔識科技，唔熟代工，點會明白咁多嘢吖。

多謝A先生提點，果然係有經驗之談。騎騎，左丁山假假地做過銀行，上世紀八十年代平均每個月出差三至四次，在星馬泰印菲台日嘅酒店留下不少腳毛，或多或少都知道邊本帳簿可以相信嘅。有一次見到一份泰國工廠損益帳，蝕到眼坦坦，但同一廠家與美國合資聯營嘅同一行業工廠，純利率超過一成，何以有此分別？廠家對左丁山講：「同美國佬合作，一蝕本佢哋就話要查數，又要增資，好麻煩o架，自己獨資嘅廠就唔同，我哋同稅局有偈傾嘅啫！」一講就明白晒，從此學曉Profitisafunctionoftax嘅道理，其實成個東南亞都係咁，唔係啲賓架做貸款，點會成日要私人擔保或者要有磚頭抵押噃。