【潮神玩轉廟街】孖阿肥唱爆咪 尹光:人哋興乜我咪興乜
廟街尹光24味成員阿肥潮神
現年70歲嘅「廟街歌王」尹光,名副其實老頑童,貪玩追風,佢近日孖住42歲24味成員阿肥rap咗首《潮神》。佢哋日前接受《蘋果》專訪,為咗配合「潮神」主題,阿肥帶咗尹光去銅鑼灣一間潮店買衫,見到貨架靚衫,兩男貪靚本色現形,阿肥同尹光互相為對方揀衫,齊齊轉新look。
話晒大家都係rap得之人,傾傾吓突然興起當街互動,尹光口痕唱咗段經典金曲《廟街》:「嗱,香港廟街好風光,老友記全世界得呢一處,啲街坊全球遊客,個個都稱讚認真正。」阿肥就輕鬆rap接《潮神》:「一睇就知我係文青,人稱藝術型,你啲凡夫俗子又點會明,你哋儲緊Figure咋,我儲雕塑,你哋睇緊連環圖,我睇緊梵高。」尾段仲爆出雙倍火花,阿肥搭住尹光膊頭,不約而同當街舉中指。
你咪睇尹光雖然喺70年代已經開始活躍,查實佢行走江湖幾十年,到0依家都仲係好潮,喺創作或演藝上都冇脫節,阿肥就超級欣賞呢位有料前輩:「你唱粵曲縱橫幾十年,流行曲又冇問題,Rap又搞埋,又演埋戲,我哋冇嘢撈喇!」「老薑」尹光謙虛話:「搵食吖嘛,隨遇而安,人哋興乜,我咪興乜,我由《少理阿爸》唱到0依家幾十年。」尹光話講rap,佢會認為rapper出身嘅阿肥先係大哥,尹光話:「學到老,做到老。」
訪問期間,尹光全程中氣十足,佢細細聲講嘢都有爆咪效果,阿肥話尹光:「你中氣下下喺丹田出。」尹光鬼馬咁回應:「咁你咪可以出啲低氣。」講到靚聲王,尹光封已故名伶新馬師曾:「佢『背功力』驚人,頸後發力,佢嗌出嚟嗰吓好勁,我都冇辦法做到。」尹光話粵劇名伶好有功架,佢哋真係台上一分鐘,台下十年功:「早期完全冇戴咪,台上講嘢,最後面嗰行都聽得到。」尹光把聲響亮除咗勤力有功,仲自爆後天都要補一補:「後生時唔使養(聲),但0依家年紀大,要養聲喇,會食吓冬蟲草補氣。」
尹光除咗中氣,佢記憶力都驚人,以前唱過嘅歌已全部記晒入腦,開騷從來唔使睇字幕機:「睇住我反而唔識唱,見有字一郁,我會空白咗,冇嘢郁我反而好專注。我哋年紀大,個腦好易唔記得,有時去廚房攞乜都會唔記得,不過記曲詞我好落力記得。」阿肥聽住尹光係咁講,佢忽然上話好想學唱粵曲:「呢個範疇好多欣賞角度,裏面真係包含好多功力。」見阿肥充滿興趣,尹光話願收佢為徒,教佢唱粵曲。
尹光下月17又號又會喺文化中心開騷,仲話預咗邀請阿肥做嘉賓。尹光每年都會喺香港搞騷,其餘時間就走埠登台:「每個歌手知名度唔同,有啲幾百萬蚊唱一場,有啲可能幾百蚊一場,唔可以評論人哋。我一路有嘢做緊。有時我一個月唱幾場,有時半年都唱唔到一場,每年可以唱幾場都唔可以講定,我哋都要等人book,可以接一定接。」以尹光知名度同資歷,當然有足夠本錢「食老本」,佢話:「可以講係好天斬埋落雨柴,有咪唱多啲,我得就同老婆周圍去玩。我平時生活好慳,係應慳則慳,應使則使,但點慳就好難同你講。」對於近年樂壇不停萎縮,尹光大嘆:「唔關歌手事,係社會問題。」
堅持永不言休嘅尹光,原來都仲有嘢想試?佢衝口而出:「我想拍長篇劇,嗰啲未做過,我唔怕辛苦㗎,唔辛苦邊得世間財,最好係做嗰啲半忠半奸嘅角色,適合我年紀啲角色,類似夏雨嗰隻。」
採訪:陳杰
攝影:陳慧安
攝錄:葉君海、林德雄
場地:WAGAMAMAPLAYGROUND