日本組合SMAP解散半年，除木村拓哉繼續效力尊尼事務所外，早前有傳中居正廣都「變節」續約尊尼，其餘三子香取慎吾、草彅剛、稻垣吾郎會於9月滿約離巢發展。

日本各大報章今日證實三子離巢消息，佢哋會於9月8日約滿後便會離開尊尼事務所，消息指三人於本月初與高層見面表明唔想再續約嘅意願。外界估計佢哋離巢會跟隨前經理人飯島三智重新展開事業，但因尊尼財雄勢大，估計三人會有兩年空白期，未能於電視露面。

原本除咗木村之外其餘四人都唔會續約，但日前傳出中居於散解後深感工作人員辛勞，亦知道離開後發展不易，決定留喺尊尼事務所繼續發展。

香取慎吾、草彅剛、稻垣吾郎確定離巢後，社長Johnny喜多川亦罕有作出回應，表示尊重三子決定：「無論在何處，或以甚麼立場，為他們着想的心都是一樣。他們三人一直都非常努力，我亦深信他們日後能令人感動及幸福。」