【記住1834633】一場波輸成個月糧 賭徒自白:最致命弱點就係呢樣......
賭債追數賭波世界盃負債外圍大耳窿
「為咗賭波,我即使返工,每隔1至2分鐘都會拎部電話出嚟睇(賽事)比數,凌晨2、3點開波就會自然扎醒!」28歲的阿華10年前沉迷賭波,月入一萬多元,但賭一場波卻全數輸掉,結果欠債40萬元,曾誓言戒賭,但死性不改又沾手賭博,最終走投無路下要瞓街,才決心向戒賭中心求助,足足花了4年終成功戒賭。
從事服務性行業的阿華18歲開始賭波,「本身自己鍾意踢波,報紙又有賠率,加上剛出來工作,身邊同事話題離不開賭波,於是到馬會申請投注戶口!」他起初以為投注前,肯花時間做功課,要贏並不難,「但原來一旦輸咗,根本唔會分析咁多,控制唔到注碼,最終愈賭愈輸!」
令他最難忘的是上屆世界盃,巴西對德國輸7比1的賽事,「我賽前投注,買巴西平手盤,以為巴西唔會輸,點知我當晚凌晨2點45分起身,巴西已經輸咗2球,我去追(加注碼)巴西入波,一直追,但半場德國已經贏5球,我足足輸咗1萬元!」
22歲那年,阿華已欠財務公司40萬元,借到無可再借,「我唯有借大耳窿,但原來借1萬,扣除中介費等,實質攞得3500元,之後卻要還1.5萬元。」在苦無對策下,他見到馬會apps彈出戒賭熱線,遂嘗試致電,「起初都好掙扎,但有勇氣打咗呢個電話,佢哋就會引導我點走,至少多一個人同我傾,我個心都安靜啲!」
他定期到中心接受治療,包括與社工面對面傾偈、發掘他其他興趣,但2、3個月後他見債務少了一些,便心癮再起,再次賭博,「阿媽知道我再次賭波,好心痛,話如果佢睇唔開,就一早死咗,每次講呢個話題都喊,我自己都覺得內疚!」他最後賭到輸清光走投無路,又不願面對家人,「試過瞓碼頭、瞓公園,等阿媽朝早返工,我先返屋企!」
最後他醒覺不想家人再次失望,遂決心戒賭,「話畀身邊人知,我戒緊賭,等佢哋唔好引誘我!」同時在戒賭過程中,社工透過發掘阿華其他興趣如音樂、攝影、參加足球小組等,又參加不同活動令他認識一批新朋友,最終他花了4年才成功戒賭。對於世界盃將至,他呼籲青年切勿賭波,因為賭徒最致命的弱點就是太自信,「我以前好自信,以為一切可控制到,但原來一賭,即使幾好定力,都會沉迷落去!」至於已沉迷的賭徒,他也提醒:「雖然好難一下子叫佢哋唔好賭,但至少唔好借錢嚟賭,因為係一個無底深淵,應及早向戒賭中心求助!」
戒賭熱線:1834633
東華三院平和坊:(熱線) 2827 4321 / WhatsApp:6770 5599
香港戒賭中心:(熱線) 2426 6262
明愛展晴中心:(如有緊急情況,請電) 18288 / WhatsApp:6829 8764
路德會青亮中心:8108 3933 / WhatsApp:6606 3933
錫安社會服務處勗勵軒輔導中心:2703 9811 / WhatsApp:5313 3011
基督教新希望團契:8116 0083
工業福音團契:2748 7207
社工會透過單對單傾談,了解賭徒的心癮。(周子惇攝)
阿華18歲起開始賭波,曾欠債40萬,更試過瞓街,他勸勉年輕人切勿賭波。(周子惇攝)
阿華曾接受藝術治療,將心底裡的自己畫出來。(周子惇攝)
東華三院平和坊會透過音樂治療病態賭徒。(周子惇攝)
世界盃全城狂熱,賭波人數亦隨之上升,令人關注病態賭徒問題。(周子惇攝)