當年今日
關於我們

中環在線:
澳至尊太子女曾幫手派傳單 - 李華華

蘋果日報 2016/07/28 00:00


好多上市公司都鍾意揀靚冧巴做上市編號,今日起招股嘅澳至尊(2031)一樣。唔講唔知,主席蔡志輝話「20」同「31」呢兩組數字,對佢同太太有特別意義,分別代表佢對仔女嘅生日日期。
蔡志輝憶述,當年跟太太何家敏一齊喺工展會擺檔,阿女當年未夠10歲,已經成日幫手派傳單、試食產品,做到攰嗰陣,會喺檔口啲貨上面瞓着。佢一對仔女今年分別8歲同14歲,噚日細佬要上興趣班,冇出席記者會,家姐就一早到咗,好乖咁坐喺前排聽足成個鐘。
唔止一對仔女,蔡志輝仲好有太太心,專登揀喺舊年12月3日遞表申請上市,原來呢個日子,係佢同太太結婚15周年紀念。佢話,咁樣就一定唔會忘記喎!
聽完確實有啲骨痹,但旁邊嘅蔡太應該好冧。