由於財赤七百億政府手緊莫水,添馬艦政府總部同新立法會大樓嘅興建大計被迫擱置,辣㷫班議員,噚日煲呔曾同立法會行政管理委員會召開閉門會議解畫。
政府同議員最大分歧,就係立法會可唔可以同政府總部分開兩個地方起,煲呔曾話中環有七個選址,包括中環街市、中信大廈對開未填嘅海面、國金二期對開停車場等,但政府代議員考慮過,覺得唔適合。行政署長黃灝玄重幫老闆口,話呢七個選址都冇意思,因為錢係最大問題,「有錢嘅,聽日都可以喺添馬艦起啦!」
表面上,煲呔曾同議員會後重係客客氣氣行出嚟,其實會上就爭拗到幾乎開拖。最激嘅議員當然係劉慧卿,片到煲呔發火兼拍枱,發晦氣話:「你鬧我都冇用㗎!」有議員重潤多煲呔一句,「係呀,你𠵱家都話唔到事。」又有議員估,煲呔咁躁係咪更年期到,另一位多嘴議員則笑煲呔,話佢長期俾特首投閒置散,兼遭土共狂篤背脊,抑鬱過度先失控啫。
(圖)煲呔俾班議員窒到拍晒枱。
傳真︰2623-9278
電郵︰
[email protected]