Apple春季發佈會將於美國三藩市時間3月25日舉行,有關今次大會傳聞多多,有人話係以軟件同新的網上服務為主,亦有人話會有新一代AirPods,甚至話又有新iPad。邊個真邊個錯暫時都未有人知,但確實的就是這個春季發佈會都未開,Apple就急不及待公佈下一個年度大型活動的時間,說的就是WWDC 2019(年度全球開發者大會),將於今年6月3日至7日舉行,地點就繼續是聖荷西McEnery會議中心。唔講唔覺,原來WWDC已踏入第30年,會唔會有驚喜當然未知,但就絕對肯定的是軟件主導,而官方消息亦講到,今年大會主力將在於機器學習、擴增實境 (AR) 、健康與健身等各個方面,跟過往幾年差不多。Tim Cook前排就話對發展極樂觀,仲話未來新產品會有好大驚喜,唔知今年的WWDC 2019會唔會透露有關玄機呢?