記：華籍練馬師今季發威，最近呂健威頻頻贏馬固然出色，其實沈集成亦一樣經常有頭馬進帳。

賴：無錯，尤其係配潘頓嘅沈廐馬成功率零舍高，時刻要留意，今次（8日）第三場四班1200米泥地「理想回報」就有唔錯餐士。呢匹七歲馬今季之前仲係處女馬，季初由莫雷拉同潘頓各贏一場，以為就此行人止步，不過沈集成訓練此駒確實抵讚，季內拼搏有序，狀態長期見靚，近兩場都只負於「超能力」，證明居四班必屬上風馬。今場全組馬季內未贏過，而同場有「紅褲日」等開路，「理想回報」排6檔容易取位，加上有潘頓加持可秤高多少，馬房鬥志鮮明，馬膽不作他選。

記：何澤堯剛戰三W威到盡，今戰亦有實力馬在手，相信能夠再添頭馬。

賴：第八場三班1400米草地「元朗之星」上場熱門倒灶，今次就算負重兼排14檔，我認為仍有補中機會。「元朗之星」前仗輕取「不羈的風」，質新當起有進步空間，剛戰排2檔本來好跑，偏偏遇上慢步速，馬匹早段已開始搶口，相信因為咁樣而影響最終表現。今場雖然排外檔，但快馬多較易扯散馬群，「元朗之星」好大機會搵到遮擋，論質應冠絕此組，希望何澤堯交出好表現。