公仔麵大王周文軒（圖）上周病逝，享年90歲，後日喺香港殯儀館設靈，翌日舉殯。周文軒上世紀中葉創辦南聯實業，生意拍檔包括唐英年父親唐翔千、已故政協副主席安子介等。
除咗公仔麵，周文軒仲生產風行一時嘅白貓洗衣粉，賣點係「兩毫子可洗廿五件衣服」。近年佢專注發展靈芝保健產品，好多達官貴人都係客仔，長期食用。周文軒愛創業，但自稱唔算成功商人，因為唔識同人講價，「人家畀幾多，我就收幾多。」周文軒得享高壽，可能同佢少食多餐嘅養生之道有關，佢亦做好多善事同捐錢興學，今年9月佢太太嚴雲震代表周氏基金會，捐咗520萬元港幣畀蘇州大學藥學院。