林燕妮當年跟「鬼才」黃霑相戀轟動娛樂圈，那些年黃霑與倪匡、蔡瀾及金庸是好友，經常帶林燕妮出席飯局，現霑叔和林燕妮相繼離世。倪匡接受《蘋果》電話訪問獲悉林燕妮走了，他說：「哎吔，佢唔係好大年紀喎。」記者告知林燕妮享年75歲，倪匡說：「差唔多啦！都唔係好似黃霑60幾歲走咗，佢75，有乜出奇，人生七十古來稀。」林燕妮跟兄弟姐妺都因癌症走，倪匡說：「家族遺傳！佢咪去得遲囉，佢啲兄弟姐妹去得仲早，林振強50出頭（林振強終年54歲），咁有才氣嘅人，佢係一流人物，去得咁早，70幾歲算長命，仲想點！難怪佢最近一啲消息都冇。」

問到兩人的交情，倪匡坦言：「我主要係黃霑問題，我同黃霑好老友，不過大家都好欣賞佢嘅才氣。我同佢真係唔係好熟，好難講佢為人點。」當年霑叔經常帶她出席聚會？倪匡表示：「係呀，大家成日一齊。」問到相處如何？他說：「佢咁洋化嘅人，我咁老土嘅人，大家冇乜交往。佢鍾意嘅嘢我唔識，我鍾意嘅嘢佢又冇興趣，我同佢本身冇乜交往，只係同黃霑有交往。」

有指倪匡當年因為霑叔關係，曾批評林燕妮為人自我高傲？倪匡大笑：「我唔係佢條菜，喺我面前有乜嘢人可以高傲，哈哈哈！佢同黃霑分開之後，其他人係好嚟好去，佢又唔係！」問到當年是否反對霑叔跟林燕妮拍拖？倪匡說：「人哋嘅事，我哋有乜權贊成同反對，成年男女分手，關我哋屁事。」霑叔有否分享感情事？他說：「佢私人嘢我哋唔理，亦冇興趣，我同蔡瀾都唔係諸事八卦嘅人，每個人係自己個體。」

問到對林燕妮的印象？倪匡說：「好靚女，好有才氣，又叻又靚。」有否看過林燕妮的作品？倪匡說：「佢頭幾本小說都係我寫序，當年係霑叔關係。佢寫嘅嘢小說同散文都好，佢嘅散文非常好，嗰時林姑娘散文喺明報發表，我同金庸之間有句對白，金庸話所有女作家當中，佢寫得最好！我話要省咗一個字，佢（金庸）問我省邊個字？我話省咗個『女』字！佢寫嘢非常好，尤其早期嗰啲，感情非常真摯一流。」

最後倪匡慨嘆：「總之人梗要去，好快輪到我！我都好多年冇見佢，差唔多20年，我喺美國三藩市住嘅時候，佢嚟探過我三、四次。」