當年今日
關於我們

【短片】【講到喊】劉燕妮參加格鬥騷:對手下下打眼同鼻,陰影好大

蘋果日報 2016/03/06 06:00

蘋果真人騷龍小菌TheOneWinkie鄧穎芝唐紫睿Hazel黎美言唔怕死犯眾憎郭思琳劉燕妮鄧洢玲ViuTVG-1格鬥會Rika大難不死必有後福預咗受傷

今日ViuTV喺尖沙咀為女子格鬥真人騷《G-1格鬥會》宣傳,參加者黎美言(Winkie)、劉燕妮(Rika)、鄧穎芝等人都有到。

呢個節目未播出已經傳出呢班女仔不和,尤其係黎美言,今日佢就同Rika齊齊做訪問,記者問Winkie係咪打傷Rika?Winkie話:「其實賽果唔講得住,自己腳趾公歪咗,都冇喺平台公開講,想專心打好比賽,比賽得預咗受傷,大家都簽晒生死狀,自己唔會將傷勢放大,屋企人都覺得個女好勇敢,老闆叫我下次唔好再參加。」

問佢係咪影射緊某人?而其間Rika一直唔出聲,Winkie話:「絕對冇,我只係講自己,我唔係好理身邊嘅人,自己啲傷11月到而家都仲未好,拍時第一場,自己因為有胸膜炎,片入面你哋見到我係咁揼心口,唔係扮猩猩,抖唔到氣,係忍住痛,唔想比對手知道有呢個傷,免對方向心口打。」

問到個傷係比賽搞到咁?Winkie話:「訓練過度勞損。」節目入面係咪不和?佢繼續表示:「自己應付比賽時已經好辛苦,EQ要好高,有事發生啲人都打嚟問我關唔關我事,雖然有啲係關心。」

Rika此時終於開口:「其實冇不唔不和,不過係真係發生啲唔開心同憤怒事,唔尊重嘅事係發生咗。」問到不受尊重係咩事?佢話:「比賽係應該有體育精神,如果比賽時受傷我接受,但對手講挑釁說話就會唔開心。」咁係咩說話?佢就「er」咗好耐話:「好似我聽過一句『其實我唔想打你』,我覺得受傷會接受,聽到呢啲說話會唔舒服。」因為俾人睇少?佢立即話:「其實我唔弱o架,大家睇返呢個節目就會知道。」

問Winkie句說話係咪佢講,佢話:「大家留意個節目啦,大家比賽都係專注自己。」係咪因太自我所以冇理人?佢就話:「我對得住自己良心,人哋諗咩我控制唔到,我講咩人哋get到咩我控制唔到,啲是非令我好頭痛。」

咁簽生死狀打傷人係咪唔使道歉?Winkie話:「我係好心軟好坦白嘅人,如果令到人哋唔好,自己一定會sorry,節目內都講好多sorry,同師傅同屋企人講,媽咪起初嬲咗我,自己要做一個有禮貌嘅女仔,我其實職業係歌手,嚟緊專注唱歌。」

問到Rika點睇對手?佢又再勁緊張係咁「Er」,問佢係咪有口難言?佢話:「er…自己控制唔到人哋點樣諗,自己做好自己,我唔識評價人哋,如果一個比賽度,對手下下打眼同鼻嘅,對我嘅傷害同陰影係好大,自己真係有一次休咗大半個月先好返啲。o依家隻眼仲有飛蚊症,醫生同我講有機會係永久性。」講到呢度就喊起上嚟。

Rika續說:「因為受傷,本身公司安排咗2部電影比我,因為受傷都參與唔到,新人嚟講損失好大。」屋企人鬧?佢話:「冇,係好心冇同好擔心。」之後唔會再參加比賽?佢話:「呢個我要諗一諗,有件事我想克服,想有一個重賽,覺得自己可以做得更加好,希望到時真係有,會增肥20磅去打,今次比賽我係最輕。」

Winkie加把嘴:「其實我都好欣賞佢嘅,佢係最細粒一個,賽果唔可以講,但最尾有一個投票,投最欣賞運動員,我投咗佢。」講到你被封為犯眾憎?Winkie話:「有聽過不利自己嘅新聞,參加呢個真人騷已好大壓力,中間自己都好驚,不過節目出街後就可以睇到,就知道我冇做過咩唔好。」