噚日「歐元之父」、1999年諾貝爾經濟學獎得主蒙代爾嚟咗香港，同行嘅仲有另外兩位諾貝爾獎得主：托馬斯．謝林，同埃德蒙．費爾普斯。3位猛人喺呢個時刻嚟到香港，究竟為乜？
為頒獎！呢個獎叫「蒙代爾世界經理人成就獎」，今年第四屆，得獎嘅有100個中國大企業嘅領導人。

得獎人不斷冧莊

雖則話中國地廣人多，企業亦唔少，但要每年搵100個「夠照」嘅老總唔係咁易，所以蒙代爾世界經理人成就獎喺呢4年嚟，得獎人來來去去都係嗰班，好似海爾集團張瑞敏4年都入選；中國人壽（2628）楊超攞咗3年；TCL（1070）李東生亦攞咗3年；至於蒙牛（2319）嘅牛根生、中電信（728）王曉初、中移動（941）王建宙等，過去兩年都攞過獎；連就嚟喺香港上市嘅SOHO中國（410）話事人潘石屹，同波司登（3998）嘅高德康都喺2005年入選過。

代表搵大師影相

個獎係由蒙代爾授權畀《世界經理人》周刊、《蒙代爾》雜誌（中文版）同美國《哥倫比亞新聞評論》（中文版）等50家財經、管理媒體聯合評選……講到呢度，淨睇牌面，最大隻「煙士」都係得蒙代爾，所以各得獎人全部只係派代表嚟攞獎。
不過，出得自己個名兼遠道嚟港，蒙代爾都有「專業」精神，即使係代表，佢都逐一頒獎。對於啲代表嚟講，先唔講要交差，話晒見嗰個係諾貝爾得獎人，個個得獎者都搵3位名牌經濟大師合照，就係咁，諾貝爾得獎人慘變真人佈景板。

蒙代爾勁讚伯南克

美國聯儲局局長伯南克狠狠咁減咗半厘息，令到全球股市風起雲湧，喺呢啲咁嘅大日子，幾位經濟界巨人喺面前，齋影相確係嘥啲。對於華華嚟講，重頭戲梗係聽佢哋為環球經濟把脈。
蒙代爾大讚伯南克，話佢夠勇，肯大刀闊斧減息半厘，解決咗美國次按問題，刺激全球經濟。至於仲使唔使再減息，就睇定啲先。不過，佢就唔多讚賞中國加息，認為只會吸引更多游資流入中國，令中小民企受壓。佢認為中國最好回復以往固定滙率政策，將人民幣同美元掛鈎，好似香港咪做得幾好，雖然面對美元升跌，或者會有通脹通縮壓力，但影響程度唔會好大；總好過日本當年將滙率大幅升值，結果經濟呆到𠵱家。
[email protected]