「港版國安法」下人人自危，「港獨」變成敏感字眼，就連媒體都要改名「避險」？八方今早發現，網媒「香港獨立媒體網」嘅Facebook名突然改名為「獨立媒體inmediahk.net」，Instagram 同Telegram都統一改咗名。

獨媒主編黃俊邦回覆八方話，呢個決定係噚日作出，但由於之前都試過畀法官問：獨媒係咪支持香港獨立？所以媒體內部其實已經就改名討論過好多次。而原來早喺2017年，特首林鄭宣佈開放純網媒登記嗰陣，佢哋嘅新聞註冊已經叫「獨立媒體」，「所以如果話改，其實一早改咗。」

佢承認，「港版國安法」都係今次決定嘅考慮因素，但係改名、報道內容、落唔落記者名之類，都只係其中一樣「應對」，最擔心都係有投稿人撰稿，「因為我哋真係會成篇刊登出嚟。」好似今年5月份，獨媒正係因為刊載荃灣區議員岑敖暉 「周梓樂被香港警察謀殺身亡，半年」的文章，而收到律政司來信，文章暫時下架，並要索取法律意見。

黃又提到，當年幫獨媒改名個陣，係參考咗台灣嘅獨立運動，所以好刻意咁將獨媒前面加上「香港」，想話「獨媒」立足於香港。但係近幾年，出現好多「少麻煩」同「五毛打手」，令佢哋運作上都受到影響。

但其實大家都會簡稱「香港獨立媒體」做「獨媒」，所以黃主編都話，如果公眾嘅認知唔係叫「獨媒」，佢可能都會保留返個原名喎。

-----------------------------

《蘋果》英文版免費試睇：了解更多

英文版已登錄《蘋果》App，立即下載/ 更新：iOS / Android

-----------------------------

支持蘋果深度報道，深入社區，踢爆權貴，即Like蘋果專題及調查組FB專頁！