恒指一度萬點不保，最後守得住，收10061，9月期指略為低水，但亦係守住一萬大關。美股若然冇乜大壞，港股萬關可守，做嘢揀Call埋手着數過揀Put。
跌市中九倉（004）曾低見15.80元，收16.20元反有10仙升幅。九倉中期盤數靚，有基金捧場，下鋪若見回落，不妨細細注兜啲九倉Call輪博反彈。9190有差唔多3個月壽命，昨日最低11.4仙，收13仙，升2%。溢價3.3%，槓桿率12.5倍，留意喺12仙以下買貨。九倉有件明年6月到期嘅Call輪9476，收31仙，溢價4.8%，槓桿率5.2倍，數據亦係唔錯，吼住低些少例如見28仙買入。

中信Call輪揀9037
逆市而升嘅大嘢另外有中信泰富（267），曾跌30仙，埋單反升5仙。先4日盤數彈出，靚靚，股價有正反應好應該。近幾日個市唔生性之時，中信啲買盤仍然好勁，收貨者態度積極。
個市第日醒番之時，中信大有機會跑贏大市。退一步嚟講，個市唔妥，中信抗跌力亦會強過其他股票。吼中信Call輪，最正路對象係9037，微有貼水。9160負溢價更多，不過時日有限，炒賣都係9037着數。
章　盛