網上討論區近日瘋傳一篇《TVB姓黃高層麻煩你入一入黎》的帖子，當中轉貼了一位兼職餐廳女職員的IG貼文，抱怨指TVB一黃姓廣告部女高層日前到其任職的食肆光顧，黃姓女高層因對方不滿未獲安排坐到吧枱位置看廚師煮鐵板燒，於是向餐廳投訴，貼文更指黃姓女高層恃着自己職位，放下卡片要脅餐廳永不再錄女職員。貼文中又寫道，黃姓女高層更指明會找無綫節目《東張西望》到餐廳採訪，最後女職員被公司解僱。

女職員形容被「黐線野蠻客」投訴：「返咁多年工第一次俾人投訴。因為坐唔到嗰個位食餐飯就要投訴到人無得撈。」又指自己太善良惹禍，事件後感到無奈及委屈。女職員又指：「奈何我真係好唔好彩遇着個咁既（嘅）X客，事隔個幾星期仲投訴緊想搞大件事，除咗要公司全線分店永不錄用我呢個方案之外，其他通通不接受。仲講到明搵咗佢公司《東張西望》隊crew嚟我公司。」女職員質疑有人濫用權力：「原來可以咁樣利用自己嘅權利/公司嘅影響力作為自己宣洩不滿、趕盡殺絕一個員工嘅渠道！」最後女職員更謂：「希望呢位黃女士高層嘅仔女唔好有樣學樣咁去濫用自己嘅職權同助長左（咗）香港看似合理嘅投訴文化。」不少網民看到貼文後紛紛鬧爆TVB黃姓女高層，直斥她「斷人衣食如殺人父母」，又指女高層濫用職權等等。

《蘋果》記者今日聯絡上在TVB廣告部任職的黃姓女高層，但事件變成羅生門！

黃小姐否認濫用職權等相關指控，直指整件事被屈。黃小姐說：「其實件事唔係咁，不過我唔想搞到咁大啫，我想講個員工真係做得唔好，我擺低卡片係想contact佢個經理咋，我想講我係小職員嚟咋，我要投訴嗰個小姐服務態度的確好差、好寸。」

對於表示要找《東張西望》到場採訪，黃小姐解釋：「《東張西望》有投訴熱線，我只係話請個女仔講番同一樣嘅嘢，我只係唔滿意個女仔，我冇逼佢炒佢嗰樣嘢，我冇講過呢啲嘢。我係一個顧客，無論我喺邊度做都好，冇關係，佢公司service做得唔好，我投訴，因為佢老闆唔喺度，亦都好耐冇回應，所以我擺低卡片，請個老闆回應我，就係咁簡單啫。佢點對呢個小姐，同埋網上邊好多嘢都係唔正確，我都同佢老闆講過，請佢出嚟澄清，唔好屈我，我發誓我冇叫過老闆炒佢，我只係投訴佢service唔好。」黃小姐表示有看到女職員在網上發表的言論：「我同個老闆講，請你搵人出嚟澄清返啦，唔係我講、唔係我做。」

再次問到是否提過向《東張西望》投訴？黃小姐說：「因為個女仔服務態度好差，直情當我好似乞兒咁，我問過啲朋友話《東張》有投訴熱線，我話我會去投訴囉，唔係因為我喺TVB做所以我去《東張》囉。」最後有否向《東張》投訴？黃小姐說：「我冇，因為嗰位主管話唔使搞到咁大，佢（主管）同我道咗歉，咁咪算數囉，佢話佢會再培訓啲人，跟住佢自己講又話要炒人又要剩，講真吖，呢啲敷衍說話嚟啫，佢仲話嗰個係partime嚟，佢會再同員工講，希望service做得好啲，個故仔就係咁啦。」

《蘋果》問黃小姐有關餐廳詳情，她表示：「我唔想搞大佢，我叫咗佢老闆handle㗎啦，你問我我只能答，嗰個職員service好差，仲講啲說話好難聽，所以我先至投訴㗎啫，我係以一個顧客去投訴，唔係我喺TVB度做囉，我亦唔係攞住張卡片去壓人囉。」

《蘋果》記者曾嘗試透過社交網聯絡被解僱的女職員，但暫時未獲回覆。

《蘋果動新聞》訂閱新世代，4月開始免費訂閱，現在接受登記！
http://bit.ly/2Ja3IXw
-----------------------------
《動腦Q》周末主題夜
追加星期六、日 9:30 pm
星期一至五 10:30 pm
Day Day Q the money!
https://hk.adai.ly/veCxssynnV