今年50歲嘅美魔女羅霖早排去咗法國南部，為佢洋酒生意拍攝宣傳相，仲喺其中一個已經列為法國文化遺產嘅古堡ChateaudeMercues影婚紗相。羅霖身穿兩套設計師好友幫佢度身訂造嘅婚紗，谷胸性感，身型依然fit爆。

美魔女接受《蘋果》訪問時就透露，今次去歐洲主要有兩個目的，其一係幫佢自己間酒公司影相，其二係佢一直好嚮往古堡影婚紗相，而佢嘅夢想，就係喺古堡影婚紗相。羅霖仲話因為時間緊湊，只得一日半時間拍攝：「酒莊嘅人好熱情，招待我哋食晏，品酒，食成3個幾鐘，好彩o依家當地成9點幾先天黑，所以先趕得切。」

問羅霖有冇好似影寫真嗰時咁，要地獄式keepfit，佢就笑言：「冇上次咁做運動，係飲食上注意少少。」羅霖話已有10幾年冇著婚紗，會唔會有感觸？佢話：「以前拍劇同雜誌影相都有披過婚紗，講緊接近10幾廿年冇著過婚紗，今次可以著返好開心，同係呢個環境好浪漫，我又唔會覺得特別唔開心、感觸，反而係開心嘅，覺得實現咗人生其中一個夢想，我覺得女性唔需要有另一半先影婚紗相，趁住自己仲有一啲衝動，想做就去做，美好回憶值得留念。」

另外，輯相入面仲有個「神秘人」做美魔女另一半：「我有個朋友好好，自動請纓做拍檔，不過呢個要賣下關子先，睇下佢會唔會係一個可以繼續交往嘅朋友先，如果係先可以放佢啲背影相出嚟。」