飛魚王子方力申近日秘密練兵,務求以一個新形象示人,原來他正在學習跳舞,希望於舞台上一展身手。日前,Alex於九龍城一個排舞室上堂,經過一輪熱身後,Alex便正式在教練指導下大跳勁舞,且跳得有板有眼,只是偶然忘記步法而獨自儍笑。
狂練蜈蚣彈
經過個半小時的訓練後,Alex已經滿身大汗,不過活力充沛的他仍不停地打觔斗,甚至連續多次表演「蜈蚣彈」。事後,教練傑仔大讚Alex聰明、領悟能力高,而以一個完全未學過跳舞的學生來說,他給予Alex七十分。
Alex表示最大死穴就是跳舞,他說:「起初我同記者講我會跳舞時,所有人嘅反應就係『吓!你跳舞?』阿Sir教我基本動作時,起初我都跟到,不過之後動作開始多,我就開始跟唔到。」
節奏感唔夠
Alex續說:「嗰時我成日覺得點解人哋可以跳到咁好睇,但係自己個動作就差好遠。其實我覺得自己嘅節奏感同柔軟程度做得重唔夠好,無論如何我都會畀心機學,因為我覺得作為一個藝人應該不停咁去增值自己,學多一樣嘢就多一樣裝備,到時上到台表演就唔使好似一嚿木咁企喺度啦。」
採訪:李珮洳 攝影:仇志德
場地提供:ARJDanceCulture