【Kiss=刨】結婚兩年似初戀 撒嬌人妻王菀之望住老公仲怕羞
王菀之蘇卓航
王菀之同老公蘇卓航(Eric So)今日喺尖沙嘴出席Kiss Cam「視」愛車行動,司儀問佢哋平時用咩方式kiss,Eric So笑住話:「好似食西瓜係咁刨。」王菀之表示雖然結婚兩年,但望住老公仲係怕羞,問到老公「刨」佢咁點算?佢笑住話:「唯有俾佢『刨』,避開佢眼神。」
講到今次出活動嘅酬勞,各自收定王菀之袋晒?王菀之好冧咁望住老公話:「你話點就點啦!」Eric So表示:「我返去篤下計數機先,睇下過幾多俾佢。」聖誕節快到,王菀之打算煮聖誕大餐,不過只會搞一個小型派對,佢話:「可能得1、2個人,因為我哋鍾意喺屋企,佈置吓屋企,簡簡單單已經好幸福。」問佢會煮咩?王菀之指老公平時唔俾佢揸刀,因為佢揸刀手勢太危險,佢話:「但我又可以煮到一餐飯出嚟架喎,其實我哋會分工合作,佢負責切嘢、清潔工作。」講到王菀之嘅廚藝,Eric So話俾99.9分,王菀之笑話:「佢食幾多飯就知我嗰餐成唔成功。」
更多娛聞,喺晒《娛果》
http://fb.com/appledailyent