預算案「減甜」，民主黨何俊仁卻為預算案「加鹹」。話說鐵頭仁噚日喺鬍鬚曾宣讀預算案期間，唔知係咪被悶親，公然攞住iPad欣賞囡囡性感相長達至少幾分鐘，唔少攝記都影到呢一幕，鐵頭仁知衰後歸咎自己太攰，喺議事廳內「分咗心」，強調平時好少咁做，對此非常抱歉喎。黨主席劉慧卿知道後，即時訓示鐵頭仁唔好再咁做，叫佢行為要檢點啲。

噚日預算案公佈期間，攝記嘅快門聲突然連珠炮發，但鏡頭唔係對住鬍鬚曾而係鐵頭仁，因為成班攝記睇到鐵頭仁用iPad欣賞起碼七張、盡騷幾吋長事業線嘅囡囡艷照。一班記者即時追訪鐵頭仁，最初佢話係啱啱瀏覽睇到㗎箒，贒女相喺網上瘋傳後終於認衰，直認喺會上「分咗心」，畀人唔認真感覺，以後會避免，坦言：「我係非常抱歉，大家都知我好少咁樣，可能因為近排太攰，做咗啲唔應該做嘅嘢，我就呢樣係要致歉。」
被問到究竟係睇乜嘢相？塊面紅晒嘅鐵頭仁硬住頭皮話：「我諗好多你哋都睇到，都係少女相，喺網站album度嚟嘅，我相信係可能係一啲模特兒嘅相，唔係色情嘅相。」點解會去咗嗰啲網站呢？佢話唔係有心：「咁啱就開咗一個網站嘅album睇到，我自己有自己網站，都有自己嘅資料，睇睇吓就睇咗去嗰度」。佢形容自己「非常尷尬」，今次事件「好不幸」，認錯話唔應該喺預算案場合睇呢啲相。

立法會主席曾鈺成笑笑口拒評事件，民建聯主席譚耀宗聞言亦「陰陰嘴笑」，民建聯葉國謙被問到有冇睇類似嘅相時，坦言「平日會唔會望過吓？肯定會有，但肯定唔會喺立法會會議上睇」；民主黨主席劉慧卿都叫鐵頭仁唔好再咁做，訓示佢行為要檢點啲。連專門轉載各地笑話、深受世界各地年輕人喜愛嘅港產9GAG網站亦有轉載鐵頭仁贒女相，睇嚟事件已獲國際關注。
有網民更加發現，分咗心嘅鐵頭仁同時好有學術性，睇緊一篇叫做《Milton Friedman and the Monetarist Battle Against Keynes》文章，八方請教睇過呢篇文嘅李兆富，佢話篇文係分析60、70年代，兩大經濟學派有關匯率政策同公共財政之間嘅關係。
鐵頭仁話太攰搞到要睇相，中大精神科學系教授李誠話如果精神唔好，對好多嘢都唔會有興趣喎，但點都好，要令自己精神啲，都係多做運動、充足睡眠、聽音樂睇書呢啲先有效。佢話如果控制唔到自己嘅慾望，應約束自己每日最多半小時、喺私人空間睇夠佢。

mailto:[email protected]