有睇過《夜魔俠》嘅觀眾，再睇《踩過界》，真係可能會___一聲，「嘩！致敬得咁足呀！」

有關《夜魔俠》同《踩過界》雷同之處，詳見另文。呢度不如講下啲角色。

《踩過界》喺大陸譯名叫《盲俠大律師》，同愛奇藝合作，以單機拍攝，實景拍攝(法庭當然係廠景)。「盲俠」王浩信嗰種充滿自信、胸有成竹加寸嘴同貪錢本色，處處隱隱透出《盲探》莊士敦——劉德華嘅影子。至於癲姐蔡思貝，唔知係咪監製整蠱佢，明知觀眾對佢嘅分貝不勝負荷，偏偏安排又演大癲大肺角色，動輒尖叫咆哮情緒時刻Keep住high。演嗰個攰睇嗰個都攰。而蔡思貝嗰棚爆牙，都令人諗起《食神》嘅火雞姐。

但係，蔡Baby睇得出係真係有俾心機去演，真係睇得出佢嘅用力程度，值得加獎，特別係第三集裝假大胸泳池色誘魏惠文一幕仲要被對方捏胸，蔡思貝確係夠晒放。

除咗蔡Baby繼續「輪迴」自己之外，無綫力捧嘅張振朗都係重覆佢嘅戲路，就如對上嗰部《全職沒女》，有啲似吳卓羲嗰種懶係型仔但又不修邊幅又愛尋根究底，動態表情都如出一轍。吳卓羲嗰種爛撻撻有破壞冇建設(好心做壞事)發揮到極致，唔知全盛時期嘅張振朗又會重複幾多次自己？