公民黨湯家驊噚日拎住隻磁碟慨嘆:「我屋企有三部電腦,但冇一部係讀得到隻碟!」近年買電腦基本上已冇3.5吋磁碟機,喺市面想買隻floppy都唔容易,千禧年以後出世嘅小朋友,恐怕唔知乜嘢叫做floppydisk咯,估唔到財爺咁懷舊。湯家驊質疑財爺扮窮,「唔知係政府窮到要循環使用呢啲冇人用嘅嘢。」同樣收到一隻磁碟嘅民主黨,面對呢隻文物級嘅磁碟都一籌莫展,事關全個辦事處僅得一部電腦有3.5吋磁碟機,由於電腦年事已高,讀唔讀到隻碟,聽天由命。財爺今年撥款資助低收入家庭買電腦同上網,唔知有冇預留款項自己換新電腦,或者撥款畀議員買舊機讀隻floppy呢?