論歷史，景福珠寶不遜於本地老牌金舖；論名氣，卻沒有他們響亮。以人的年歲計，景福（280）今年迎來古稀之年，然而，分店形象和品牌定位對年輕一代來說已相當模糊。曾於LVMH旗下品牌工作逾十年的沈美蓮（Paulette），兩年多前過檔景福，希望港人能再次發現這顆遺珠，「如果唔能夠達到令市民重新認識（景福）呢個目標，我會覺得好可惜」。

景福由已故香港富商、昔日與同業周大福（1929）創辦人女婿鄭裕彤份外熟稔的楊志雲於1949年創立。當時景福只賣金，是香港史上首間提煉黃金的公司，其9999足金金條非常有名，後來隨時代演化逐步加入珠寶、名錶、代理外國品牌等。

做生意不能只回顧昔日的美好。今天年輕一輩不太熟悉這品牌，更有人誤認是屋邨金舖。 「可能喺新一代裡面，未必個個都有聽過」，沈美蓮不得不承認。事實上，景福消費群主要為高消費顧客，尤以本地熟客為主，產品平均售價比大眾耳熟能詳的珠寶商更高。民生區找不到景福的蹤影，熱門旅遊區如是。2013年起景福業績開始走下坡，2019財年全年收入較2013年高峰期減少逾半，分店更退守至中環和金鐘，莫說北上發展。「任何一間公司都會有起伏，景福都唔例外」，退守中環並非公司刻意制定的策略，做生意當然希望銷售點遍佈各區，但過去十至二十年，本港零售商均面對同一個問題：貴租。公司整合門店，首要保持公司的盈利能力，再談擴張。

沈美蓮先後於不同國際零售品牌工作近30年，包括老牌英國百貨公司Marks & Spencer、法國奢侈品牌LV及Christian Dior，擔任品牌形象及拓展港澳業務的工作，總學到一些法寶令品牌走出低谷。「我做咗好多年外國品牌，呢啲品牌可能而家好犀利，個個發展好好，但如果你深究佢哋歷史，有啲甚至超過150年，佢地都遇過好多困難，咁長時間我諗冇乜可能係毫無困難。喺過程當中，佢哋尋求咗不同方法，將自己個品牌重新喺市場上畀人認識」。

機緣巧合下，沈美蓮遇上景福主席鄧日燊，當時正物色人選帶領景福，「可唔可以幫到手呢？可唔可以學以致用，去幫一個咁長歷史嘅本地品牌，用一個全新嘅面貌，畀香港市民認識番」。當時成功完成100公里毅行挑戰的沈美蓮決定再次接受挑戰。

沒聽過賣盤

2017年加盟景福之時，公司正值虧損約8500萬元。她積極與業主商討租金調整，大刀闊斧削減分店至僅餘下5間，「呢兩年係調整期，租金係一個好大嘅助力」，過去兩年穩定成本、改善效率毛利，2019財年全年業績終於扭虧賺800萬元。早年受楊氏家族鬧爭產影響，市場不時吹風景福有意賣盤，現時公司只有家族第三代楊嘉成留任董事局，沈美蓮說，董事局未有談論過「呢一方面」，未有聽聞集團有賣盤打算。

要盈利更上一層樓，除了節流更要開源，但景福目前面對的，是知名度落後於同業的難題。「公司團隊好清楚我所講嘅價值——產品質素、設計手工精美，服務專業，但而家啲人都未必好了解個團隊擁抱住呢啲價值觀，如果唔能夠令多啲人了解，我哋好難將呢個品牌介紹畀新一代人。」沈認為新一代所接納的宣傳模式是景福的最大挑戰，未來會加大網絡宣傳，去年景福亦聘請了5位大學畢業生加入管理層實習生團隊，相信能有助品牌與年輕一代打開話題匣子。

公司亦計劃走出中環區，「最有效嘅宣傳可能係店舖，因為每一天會有好多人行經過，入到嚟接觸到舖頭，都係一種方式去介紹品牌畀唔同嘅顧客。」雖然目前時勢緊張，但沈對零售市況樂觀謹慎，但她坦言，公司需要時間腳踏實地儲客源，目前正商討今年年底前在尖沙嘴多開一間分店。

記者：邱曉欣

影片
採訪：邱曉欣
編撰、旁白：張嘉鎣
攝影：細釗
剪接、後期：Steven
編審：倪敏慧

investMAN
For People of Style & Substance
掌握理財智慧 感受生活品味
http://investMAN.hk
-----------------------------
基金資料大集合 一書幫你贏盡強積金
點擊即睇《贏盡強積金》電子書