劉嘉玲、任達華同唐詩詠等前晚喺銅鑼灣出席賀歲片《我的情敵女婿》慶功宴，華哥笑話：「好多人問我幾時再拍續集，係咪要再等嘉玲姐25年，我想下年拍。」嘉玲笑話：「唔使等25年，20年我都80喇！」有指《我》片口碑好過梁朝偉嘅《捉妖記2》，嘉玲話：「我諗呢套係香港電影，《捉妖記》內地感多啲，啱小朋友，而我哋就有香港情懷。」講到偉仔之前講過話自己拍笑片一定好笑過嘉玲拍嘅笑片，嘉玲笑話：「𠵱家咪證明唔係，佢呃小朋友。」另外，嘉玲噚日喺微博貼咗同老公偉仔，約埋陳奕迅、徐濠縈兩公婆食飯聚會相，嘉玲同偉仔早排都忙住拍戲，終於忙完新年有得唞吓，嘉玲留言：「假期開始。」

林利有義氣

同場嘅胡渭康講到前小虎隊拍檔兼好友林利患直腸癌，佢話：「傷風感冒都死得人，cancer未必冇得救。當時第一時間了解林利心情，確定有人照顧佢，搵唔搵到適當醫生。」
胡渭康仲話林利上月24日做手術，自己本月2號開騷，林利都堅持要做嘉賓：「我有叫佢唔好嚟，驚佢傷口會爆。佢對舞台好有熱誠，做人亦好有義氣。」
撰文：馮仁昭