「沈旭暉婚禮現象」好快成為社會學必修科，大家都問「點解佢可以請到咁多人」？
係囉，點解要請，咁多人？
當日收到電話做司儀，還以為就是一個普通政界的婚宴，呢類活動司儀我做唔少，隨口就問拍檔人選，點知佢話，有一個司儀團隊，六個！
個個傳媒機構都有代表，無綫有線商台港台……我開始發覺，事情比想像嚴重。
我知道佢有江湖地位，但沒想他的江湖是長江咁長、大明湖咁大，特首啦、特首候選人啦、風雲電視人物啦、小小超啦……難怪當日我地六大司儀上台夾稿，現編了一句台詞：「今日婚宴，你可以傾埋政改，齊人過政府自己吹雞。仲可以搵大孖沙捐錢，再唔係，父母幫仔女搵外國大學讀書都得，牛津耶魯清華代表喺晒度！」
講個秘密大家知，新郎交代司儀工作時，不止一次說：「希望個婚宴唔好咁政治。」
你聽到都想笑呢，佢本身已經係政治學者，請嘅賓客亦係政治猛人，你又搵埋好似我同黃潔慧呢啲人做司儀，即係無可能有雞有鴨有魚最後原來話想食齋㗎！
「人在江湖身不由己」，他或許真的很想聚焦在兩個人的甜蜜幸福，但政治乃眾人之事，避無可避。
佢最勁係，左中右咩陣營嘅人都有交情，左右逢源。佢可以friend黃之鋒但同時埋梁振英堆，佢可以請佔中戴耀庭，但愛國報章辣手主筆關昭又為佢拍片祝賀；佢兄弟團好多左膠社運人，但國師教主亦係佢座上賓……
西方民主自由價值觀人士，覺得佢係自己人；進步愛國陣營，亦覺得同佢有偈傾，起碼唔係敵我關係；特首都做唔到嘅「香港營」，竟然被呢個金毛教授搭起咗帳篷。
不如咁啦，你結咗婚之後出嚟選特首吧啦，西門兄。