韓國女團A Pink成員鄭恩地初出道時因為身形比較圓潤而被網民留言攻擊，令佢決心減肥，由出道初期嘅137磅減至現時嘅104磅左右，勁減33磅。不過恩地就透露，曾因極端減肥而患上鼻竇炎，更因為健康問題而無法唱歌。

恩地早前演出節目《大國民脫口秀你好》時，一名嘉賓表示其姐姐為了想似女團成員一樣瘦而極端減肥，會唔食正餐，只飲水、吃5顆番茄仔、2隻水煮蛋充飢，令妹妹非常擔心。恩地聽見後就以過來人身份表示：「用餓嘅方式瘦得幾快，就會復胖得幾快，以節食嘅方式瘦身後，食落去嘅食物全都會變成脂肪，到時候又開始節食瘦身，只會變成惡性循環。我都曾經有過因為減肥而生病嘅經驗，當時係我人生第一次得鼻竇及中耳炎，扁桃腺都腫起來，當時我甚至冇辦法唱歌。」

恩地透露嘗試過唔同嘅減肥方式後，先終於真正了解節食雖然瘦得好快，但都會復胖得非常快，而且影響健康，後來佢開始規律地進行拳擊運動、戒食宵夜、勤去健身房做各種增加肌肉嘅訓練運動，先成功健康地減去33磅。