陳寶珠同囝囝楊天經、新抱吳文珊今日喺商台接受馬浚偉節目錄音訪問，大爆內幕，馬仔話一連4集嘅節目內容主要係講寶珠姐辛酸嘅成名路同親情維繫，馬仔仲爆佢哋一家人有咩唔開心，都會攬住喊，表達內心世界。

提到家人相處之道，原來天經喺10幾歲反叛期間，寶珠姐曾經嬲到離家出走咗幾日，寶珠姐話：「細個溝通不足，不經意就會有誤會同磨擦，有一次大爆發，本來係天經想走，點知我走咗先。」天經就話：「嗰次係第一次，亦係唯一一次，我哋冇通電話幾日，好掛住，睇吓邊個硬住頭皮行出第一步，嗰時啱啱母親節，我送咗份母親節禮物，化解件事。」天經仲話細細個就冇爸爸，寶珠姐母兼父職湊大佢，覺得媽咪係十全十美，而問到有冇試過婆媳不和？寶珠姐就好肯定話：「冇嘅！」問到寶珠姐想唔想快啲抱孫，文珊就笑言誠徵生仔秘方，寶珠姐話：「順其自然，唔強求。」