王敏德（Michael）斥資7位數字嘅自家品牌MW噚晚喺銅鑼灣新店舉行開幕活動，太太馬詩慧及三名子女曼喜、麗嘉及躍穎等總動員撐場。

Michael好友馬清偉帶同女友Winnie及兒子、薛凱琪嘅緋聞男友、澳門威尼斯人酒店高層ReggieMartin、黃佩霞、寇鴻萍母女等人支持，當中最為特別係MichaelJackson嘅三哥JermaineJackson前來，在場更有賓客帶同Jackson5嘅黑膠碟俾佢簽名。Michael一盡地主之誼帶佢上山頂睇夜景，更送咗一件價值6千幾蚊嘅仿皮褸作答謝。

馬詩慧接受電話訪問，大讚Jermaine：「佢之前去咗澳門睇演唱會，佢同Michael嘅朋友好熟，所以嚟支持吓，佢好nice。」記者笑佢榮升老闆娘，問佢會否幫手管數，佢話：「Michael呢間鋪計劃咗兩年，一步一步好似跨欄咁，終於有自己牌子，成家人幫手，阿仔係Michaelno.1粉絲，阿女都有份畀意見，唔好以為佢鬼佬，佢思想好傳統，已經計劃定將盤生意交畀仔女打理，我自己數口差，少插手為妙，不過都好戥佢開心做呢個project，梗係希望佢好生意搵到錢。」