快意Trepiuno高科技天幕概念車
蘋果日報 2004/03/30 00:00
快意汽車近年都推出有不少新車，新版Multipla及Stilo等便是較受矚目的車款，但原來另一邊廂一部酷似舊有快意500，兼名為Trepiuno嘅概念車亦已曝光，成為近期概念車新貴。
記者：鄭達基
記者：鄭達基
從廠方所公布嘅相片中可以睇到，全新快意Trepiuno嘅造型來得圓潤而流暢，再加上部車本身屬細車類別，故此望落都好Cutie，另一個吸引人嘅地方，會係廠方特別為其安排一個幾近天幕式嘅車頂設計，從而令車廂變得更開揚之餘，又能給予車上乘客有更多親近大自然嘅機會。
雖然Trepiuno概念車車長僅為3.3米，但車廂空間卻來得闊落，加上座椅係3+1模式，不僅令乘坐舒適度倍增，更可切合不同用家需要。與此同時，中控台頂端更設有LCD顯示屏幕，方便閱讀行車資料外，乘客更可以透過呢項設備去控制車上設備。至於機械配搭方面，由於廠方未有公布有關資料，故仍有待確實。
■賣相獨特吸引嘅快意Trepiuno概念車，外表圓渾內櫳寬闊。
■幾近天幕式車頂設計，成為這部概念車的另一賣點。