陳豪同陳智燊今日去到尖沙嘴出席活動，陳豪日前為大仔陳梓燁（Aiden）搞派對慶祝5歲生日。陳豪表示一個小朋友每年都舉行幾個生日派對，而3個仔女每年就搞好多次慶祝，仲會收到好多禮物，所以要諗辦法捐啲禮物出去。

陳豪又話自己依家放假都係出席仔女嘅活動，應酬仔女同學嘅家長，搞到自己冇機會見朋友，陳豪話：「仔女同同學仔玩得親密，對方家長會提議不如相約出嚟玩，我覺得作為家長可以盡量參與，今日二仔有表演，但因為要工作去唔到。」

陳智燊同太太宋熙年嘅囝囝Damon，就獲得唔少嬰兒產品贊助，陳智燊表示唔抗拒一家三口拍廣告，因為阿仔參與拍廣告，亦係紀錄佢成長階段之一。佢又提到早前同老婆去大阪旅行，但老婆因為太掛住囝囝而爆喊，佢話：「聖誕都唔會去旅行，就算係都要BB陪住我哋。」

精選娛聞，喺晒《娛果》
http://fb.com/appledailyent