由IU、李準基、姜河那等人主演嘅韓版《步步驚心》（月之戀人-步步驚心：麗），雖然開播前因出演陣容而令劇迷相當期待，不過播出後收視卻未如理想，一直未能升至雙位數，噚晚播出嘅第7集雖然比上一集稍升0.1%，但依然以5.8%收視率墊底。

反觀近期大熱嘅KBS劇集《雲畫的月光》，噚晚播出嘅第8集就以19.7%收視率，大幅領先同時段播出嘅韓版《步步驚心》同《怪物》(10.3%)，冧莊收視冠軍。第8集中劇情嚟個大反轉，原來朴寶劍無意中得知金裕貞係女兒身，之後先會有第7集情深咀嘴嘅戲碼，令以為真係玩「HeHe」嘅劇迷都放鬆一口氣。

另外，《雲畫的月光》將於本周五中秋休假時，播出特輯，除咗頭8集嘅精彩片段之外，更有NG片段同拍攝花絮。