知情人士話畀八方知,警方「天文台」已正式運作,警員逐一聯絡支聯會、民陣、四五行動等遊行、示威「常客」,查詢佢哋喺奧運聖火喺香港傳送期間會有乜行動,如果計劃上街示威,警員會提醒有關人等要按規定申請,又會問吓各團體有幾多人出動。攞咁多料,相信係要寫報告畀上頭睇,評估需要調動幾多警力、鐵馬「招呼」示威人士。
黃sir同八方講,夥計唔係做「天文台」,只係因應傳送聖火期間,可能有好多團體想舉行公眾活動,警方為協助有關團體、人士順利舉行活動,所以特別抽調各環頭人員成立上述小組,「團體舉行嘅活動可能跨區進行,我哋搵埋唔同警區同事參加,提供一站式服務。」佢又話歡迎各個有意搞活動嘅團體接觸警方,佢哋會提供最優質服務畀大家。
警方向示威人士提供「一站式」服務,聽落真係設想周到,支聯會副主席李卓人同八方講,覺得警方提供「終站式服務」,因為佢哋同小組商討示威安排,要求擴大示威區、制訂遊行路線等,對方都冇實質回應,此路不通令佢哋企晒喺度,套用劉華金句:「今時今日,咁嘅服務態度,係未夠㗎!」其實警方唔係第一次設「天文台」,年前世貿部長級會議時,警方都有派人向韓農收風,警隊「天文台」預測有幾準確,有目共睹。
mailto:
[email protected]