噚日4月1號愚人節，唔少人都喺網上「應節」整蠱大家，呃吓身邊親友。

而今日4月2號，喺李連杰嘅微博，見佢戴住口罩嘅相，口罩上面仲寫住「今天不說話」，唔好以為係愚人節未過，其實李連杰戴呢個口罩，係一件好有意義嘅事，因為今日係「國際自閉症日」，李連杰今日凌晨已表示：「今天是4月2日，國際自閉症日，此刻開始，今天不說話，傾聽自閉症兒童的世界，一起為自閉症兒童行動。」

除咗李連杰影呢張「不說話」相之外，李冰冰及趙薇都有戴住呢個口罩影相，冰冰話：「今天是國際自閉症日。以前接觸過自閉症兒童，他們是沉默的，但眼睛卻純粹得像天使，我知道他們其實什麼都懂只是說不出來。雖然我因為拍戲今天不能完全『不說話』，但我願意減少說話，關閉聽說感知，走進他們的沉默世界。」

趙薇就表示：「請用沉默去感受他們那份渴望理解與期待聆聽的心，自閉症兒童，需要你我的關注與接納。」此外，唔少藝人包括周迅﹑徐濠縈﹑桂綸鎂及鄭元暢等，都支持呢個活動，但佢哋就冇影到「不說話」相，只係轉貼咗國際自閉症日嘅文章。