行搞笑路線嘅黃建東近日同宅男女神簡淑兒（Jessica）一齊拍咗一個財務網上廣告，佢哋仲食住玩《宮心計2深宮計》劇情，佢哋變成《深宮計番外篇之深「窿」計》。

黃建東扮《深宮計》馬國明半裸出浴嗰幕，佢話：「唔知點解我係最冇身材嘅男演員，但偏偏成日都要我剝衫？好似《果欄中的江湖大嫂》，同埋《降魔的番外篇》、《平安谷之詭谷傳說》都係要半裸出鏡。」黃建東唔介意露點露，至緊要出嚟效果夠爆笑，今次黃建東就要淨係着住褲瞓喺地下撥扇、仲要有淋水場面，佢自爆：「我淋水淋咗差唔多30次，個木桶好重，啲水有幾次仲入埋鼻窿，好彩拍攝時天氣熱，冇冷親。」劇情交待Jessica無意中睇到赤膊嘅黃建東沖涼，心如鹿撞，跟住黃建東乘機錫女仔手仔同求婚，不過尾段有暗示Jessica畀黃建東戴綠帽。

黃建東淋完水仲要拍同Jessica結婚，佢話當日唔記得要帶多條底褲替換，拍淋水時，佢大膽真空上陣，好彩佢定力夠，冇尷尬嘢發生。黃建東坦白講出真相，反而嚇親女導演，搞到佢哇哇大叫。

精選娛聞，喺晒《娛果》
http://fb.com/appledailyent