上個拜禮六，蘭西搭地鐵，見到長和系馬鞍山海澄軒酒店廣告，其中一個宣傳賣點，係酒店窗戶可以開關，重話可能係全港唯一有呢個設計嘅酒店。
咁都算係賣點，認真難明。
不過，酒店窗戶唔用密封式設計，好似變成潮流，因為上個禮拜，城規會審議新地汀九酒店項目，就係申請採用獨立空調，同埋窗戶可以開關。不過，城規會話要發展商提供多啲資料先肯受理。
點解發展商起酒店，要啲窗戶可以開關呢？唯一合理嘅解釋，就係發展商根本唔係淨係諗住做旅客生意，重想吸納本地長期租客，因為呢類長期租客，可以為酒店提供一定嘅入住率保證，就算少咗旅客來港，酒店都唔使咁慘。
𠵱家酒店可以提供獨立冷氣，同埋窗戶可以開關，遲啲會唔會連廚房都有埋呢？咁就真係同住宅冇乜分別嘞。唔知啲旅客又有乜感想呢？

防止武鬥惟有罰錢
代理為咗爭客，間唔中都有推撞，甚至打鬥嘅場面，但情況開始發展到令人擔心嘅地步。
蘭西聽發展商講，代理打人事件，好似已經變成有組織嘅行為，同一班人，喺每個盤都專登撩事鬥非，通常都係打對手嘅主區或者主力員工，等自己友可以爭到客，做成生意。
搞成咁，估計係公司縱容。發展商好擔心，有朝一日搞出大件事，到時唔知點收科。
究竟點至可以防止代理打鬥事件發生，發展商認為，加重罰款最有效。無他嘅，代理咁搏命，都係為錢啫，罰得重，佢哋點都會收斂啲。
睇嚟以後發展商推盤，都要先收定代理一大筆罰款按金至得嘞。
政府話要管制地產代理時，代理業就話會自律，但發生打鬥時，就話生活迫人，似乎唔多通。
行內估計，地監局因為要加多好多人手，去各樓盤售樓處，監管代理一舉一動，開支重咗，可以大條道理加代理牌費㖭。