喺林敏驄今晚紅館舉行嘅第二場作品展中，杜麗莎演唱《假如》時唱到喊，佢話：「我等咗好耐呀今晚，你好嗎？」阿驄問佢：「唱多幾首呀？」杜麗莎答：「你都冇寫歌畀我，淨係呢首之嘛……我唱英文歌畀你聽好冇？」之後，杜麗莎拖住阿驄唱出《Can't take my eyes off you》，跟住阿驄就話：「呢part擺明老屈㗎！」

另一位表演嘉賓關淑怡，套表演歌衫同噚晚唔同咗，穿試黑色寬身裙，遮掩住佢個圓潤身形，冇再晒腩。喺唱完《梵音》同《午夜狂奔》，關淑怡開口話：「今晚好高興同大家見面唱歌，好榮幸可以參與。」阿驄就唔收口問佢：「咁快可以修咗個肚？冇事呀嘛？大家關心你呀。」關淑怡笑言：「有你支持一定好啦！」然後喺阿驄帶動之下，全場觀眾鼓掌送上鼓勵。

然後關淑怡再主動話：「我好欣賞你㗎其實，之前冇機會講。」點知阿驄又玩嘢反問：「你表白呀？仔都有幾件啦喎。」關淑怡答佢：「：我？我一件咋，唔使多㗎。真係，我好欣賞阿驄嘅詞，今日好多歌好想唱，不過冇辦法。」之後唱出《再會》。

而關淑怡喺晚上11點10分左右離開紅館，佢換上一套白色衫，喺助手陪同下離開，臨走前，佢喺後台欄杆邊走埋fans堆度傾咗一陣，睇嚟佢同嗰啲fans好熟吓，有攬攬嘅，之後佢向記者微笑揮揮手就離開。

薛凱琪離開時受訪，佢話呢兩日演出都好順利，但其他歌手演出就冇睇，佢話﹕「媽咪噚日有嚟睇都話好睇，氣氛好好，爸爸就今日嚟睇。」問知唔知阿驄心情點？佢話﹕「未有時間同佢交流，我睇唔到佢想喊，但佢係好專業，除非個騷做唔到啫，否則都要好努力去表演，如果唔係都會好投入令觀眾開心，帶好嘅回憶俾觀眾。雖然今次發生意外，但佢成件都好專業對待，俾美好時光觀眾。」上台表演有冇擔心？佢話﹕「冇，噚日同今日都係good show。」