二人組合小塵埃同岑寧兒（Yoyo），今晚喺灣仔舉行mini live show，吸引近百粉絲到場，而YoYo嘅爸爸媽媽、岑建勳同前妻劉天蘭（Tina）都有嚟現場為愛女打氣！Tina大讚囡囡唱歌好聽，仲話成日都會飛過台灣睇佢嘅音樂會。

Yoyo已經喺台灣定居，舊年仲獲提名入圍台灣第27屆金曲獎新人獎，有工作就會飛返香港，講返今次嘅合作，係佢哋第一次，原來佢哋係因為音樂而認識對方，小塵埃話：「我哋係喺暗中作樂音樂會上認識嘅，當時大家都見唔到大家，只係憑歌聲去認識，今次真正可以面對面咁合作。」而Yoyo就話大家嘅音樂路線好接近，都係不插電，懶懶哋咁，所以今次都好快就達成合作，而嚟緊Yoyo就希望可舉行個人音樂會，佢話：「係我腦裏面咁諗，o依家要有歌先，希望可以創作多啲粵語歌，有嘢想分享就會開個show。」而Yoyo話去旅行就係佢寫歌嘅靈感啟發泉源，啱啱佢就去完歐洲旅行，返嚟之後就發生恐襲，但佢就話唔會因為恐襲而怕咗唔再去。

另外，小塵埃今年將參與一個大型項目，仲已經計劃咗今年出碟。