呢幾日個市又起又跌，朝早抽高咗，忽然又倒插，晏晝開市隨時坐過山車，揸住雞碎咁多錢嘅小市民，見到個市咁癲好無奈，唔知今晚買乜餸！冇錯，八方講緊街市行情，唔係股市。近日豬肉價錢飄忽，日前一開市每擔搶到2,400蚊，噚日回順至1,300蚊一擔，之前睇豬價再升，買定多啲慢慢食嘅師奶，睇錯市真係肉赤。
民以食為天，小市民除咗昅住部大利市機，都好關心街市行情，可惜𠵱家冇人報價，立法會議員黃容根噚日建議特首煲呔曾，恢復十幾廿年前做法，提供每日街市行情畀電台電視台報道，方便買餸市民。
煲呔話畀料冇問題，但可能冇傳媒報道呢啲雞毛蒜皮資料啫。煲呔咁講就錯嘞，𠵱家contentisking，提供即時報價大有可為，煲呔驚冇人睇，反映佢思維守舊。踏入高清年代，報道街市行情梗係唔可以好似舊時咁，齋讀價錢就收工，一定要addvalue。

呢個「禽畜台」主播不假外求，由煲呔親自上陣，佢鍾意發表電視講話，變身「街市報價王」冇難度，講完豬牛羊雞鵝鴨價錢，再報埋瓜菜環球時果海鮮河鮮做緊咩價，講嚟講去都係餸菜價錢，悶唔悶呀？散戶咪又係問嚟問去嗰幾個冧巴，陸叔、菁姐都冇投訴啦！
至於其他增值服務，最基本係搵業內人士評論市況，生豬買手、超市代表、豬肉佬輪流講嘢，今日有冇超市大戶入市，導致貨源歸邊炒供求，配合圖表分析走勢，係咪時機撈底等百花齊放，仲要加入互動功能，各區街市販商、買餸師奶可以realtime報料，方便市民格價買平餸。
呢個新頻道一定要喺高清台播出，因為要做活豬、牛拍賣現場直播，好似賣地咁，全港人睇實競投過程，仲邊有人敢出術托價？市民亦可第一時間透過畫面睇到豬牛係咪新鮮買得落手，好似賽馬睇晨操、沙圈踱步咁，豬牛新唔新鮮肥美，一目了然。
環球股市由朝炒到晚，街市行情都要24小時貼市報道，日頭報完香港個市，晚黑就報巴西雪藏雞、泰國冰鮮豬、日本和牛價錢，邊度爆發禽流感、豬瘟、瘋牛症要即時報道，另一重點係國策新聞，北豬南調、開閘排牛、瓜菜直通車有乜變化直接影響民生，不能忽視。高清禽畜台唔使搵數碼天使宣傳，八方建議搵麥嘜、麥兜做代言人。