【新增內容】

現年60歲武打女星楊盼盼，本月17號喺馬來西亞拍攝電影《大地回春》一場火災戲時發生意外，現場火勢失控，約30人慌忙逃生。喺混亂下，楊盼盼臉部同手腳7%燒傷，傷勢較嚴重，預計復原時間需要要兩至三個星期，另外仲有逾20名演員受傷，有份演出嘅羅家英倖免於難。楊盼盼臉部遭二度燒傷，手腳同樣有受傷，右手更要做手術去死皮。（新聞連結： https://bit.ly/2DEYbpb ）

楊盼盼仍然喺大馬留院，囡囡Jessica今日接受《蘋果》電話訪問，佢話媽咪仍然未能返港，至於最新情況，Jessica短訊回覆：「前日洗傷口時，發現傷口同膠布同紗布stick together，結果要等多一日時間先洗到。」相信楊盼盼洗傷口時苦不堪言，囡囡都不禁大讚媽咪夠堅強：「希望快啲好返。」

Jessica透露媽咪情況好轉，下月可以回港：「媽咪係可以自行落床。胃口一直都好好，入院到o依家都好好，而且每日要食兩杯雪糕，但要戒口，戒食深色嘢。」Jessica話發生意外時，佢都喺現場，佢送媽咪入院，一直留到上周一，陪媽咪過埋中秋節，跟住飛去外國工作，後日再次飛回大馬，準備接媽咪出院。

Jessica仲話馮寶寶知道其母楊盼盼喺大馬燒傷留院，翌日即飛往探望,仲特登逗留咗三日兩夜。Jessica話:「佢之後知我要返香港工作，就即刻安排我唔係度嘅period陪住媽咪。寶寶姐自備榨汁機blender去醫院整smoothie，而劇組就一直有安排一位得力助手陪伴媽咪，所以佢今日都已經可以出街食飯。」

精選娛聞，喺晒《娛果》
http://fb.com/appledailyent