經常語出驚人的林作，繼早前炫耀4萬元一套Brioni西裝惹來不少負評後，昨日他在社交網借電影《黑豹》（Black Panther）男主角查特域克保斯曼（Chadwick Boseman）死訊抽水叫人及早買保險，再度惹來網民圍插，其中才子王貽興也在FB發文轟林作消費死者：「令壽堂俾你丟晒架，自己眠乾睡濕就係湊大個讀屎片嘅裙腳仔出嚟，諗起都戥佢傷心。」

王貽興最後hashtag了一堆文字：「想當年我搞劇你仲係咁煩住我個製片要求搲撈 #我人生唯一做過最無悔嘅決定就係同製片講死都唔好畀呢啲為搏出位咩都做得出嘅人出現響我嘅作品裡面 #我嘅劇唔係咩成功作品但最成功嘅地方係擋咗啲枉稱為人嘅垃圾冇污染觀眾對眼 #點解讀過書嘅人成日畀世人標籤歧視就係多得呢啲人辦.....無論閣下最後賺到幾多錢 #都買唔返大家對你嘅好感 #咁就一世 #買幾多靚西裝最後咪又係著壽衣 #學網民話齋 #作為某某前男友已經係你一世成就 #聽聞令壽堂當年仲要問財仔加按你地（哋）層豪宅借錢畀你繼續揮霍溝（媾）女...唔該唔好令單親家庭長大嘅孩子蒙羞。」

對於被王貽興鬧爆，林作今日在FB發文向王貽興還擊：「我啊媽打黎（嚟），認真問句：佢乜水？lol enough said. 拍咩劇寫咩文，效果都係一般，絕對唔係個成功人。靠抽水同我一般見識就真係前輩。幾年前就已經領教過此人之卑鄙。我以為佢係感情專家，同佢私底下於Facebook Messenger 傾咗一陣，甚至好似有講過下（吓）電話。然後呢？佢轉頭將一部份明顯係私人對話寫咗出黎（嚟）擺上網。當時我就知道，此人絕對係小人。」

林作續謂：「最不要得的是，佢最新攻擊我的post裡面一個hashtag講到聽聞我媽媽借財仔俾錢我溝女，呢種毫無事實根據嘅言論，其實對我而言唔叫誹謗中傷我真係唔知係咩。我保留一切追究權利，雖然學我老母話齋：識佢老鼠（媽媽私底下真實對白）。」之後林作hashtag寫道「#聽聞佢私底下啲嘢好差 #收過不少message甚至朋友經歷唱佢 #有料嘅人鬼得閒寫咁多嘢 #冇新聞巴不得搵嘢講。」

其實除王貽興外，王喜也於FB發文寸林作，王喜寫道：「撲糞蒼蠅，猜一條保險sale屎，兩個字。」網民當然估中是誰，並留言：「其實應該一人一信向保險公司投訴佢。」

-----------------------------

《蘋果》英文版免費試睇：了解更多

英文版已登錄《蘋果》App，立即下載/ 更新：iOS / Android

-----------------------------

《本土情味》結集《飲食男女》雜誌經典欄目「老字號」文章，記錄香港40家飲食老店的動人故事，見證香港飲食史的甜酸苦辣。即日起，於各大便利店及書報攤有售，並於 《蘋果日報》你的優惠 網上獨家發售！